ამერიკულმა ბიზნესგამოცემამ Fast Company-მ ყველაზე ინოვაციური კომპანიების ყოველწლიური რეიტინგი გამოაქვეყნა. 2022 წლის ყველაზე ინოვაციური კომპანიების რეიტინგში სულ 50 კომპანიაა, რომლებმაც გასულ წელს თავიანთ სექტორზე, მომხმარებლებსა და საზოგადოებაზე მნიშვნელოვანი გავლენა მოახდინეს:
- Stripe
Stripe ირლანდიურ-ამერიკული კომპანიაა, რომელიც ონლაინვაჭრობის ვებგვერდებსა და მობილურ აპლიკაციებს გადახდებისთვის პროგრამულ უზრუნველყოფას სთავაზობს. 2020 წელს ფინანსურ მომსახურებაზე ორიენტირებულმა კომპანიამ კლიმატის ცვლილებასთან გასამკლავებლად Stripe Climate ინიციატივა შექმნა. Stripe Climate მომხმარებლებს საშუალებას აძლევს, მათი ონლაინგადახდებიდან გარკვეული პროცენტით ატმოსფეროში ნახშირორჟანგის შესამცირებელი ტექნოლოგიის განვითარება დააფინანსონ.
- Solugen
ამერიკული Solugen ქიმიური ინდუსტრიის წარმომადგენელია. კომპანიამ შაქრის სიროფიდან მხოლოდ ენზიმების გამოყენებით ინდუსტრიული ქიმიკატების მიღების მეთოდი შეიმუშავა. რაც მთავარია, ეს მეთოდი ქიმიკატების წარმოების პროცესში ნავთობის, ბუნებრივი აირისა და ქვანახშირის გამოყენებას გამორიცხავს, რაც ნახშირორჟანგის ემისიას მინიმუმამდე ამცირებს.
- Twelve
ამერიკული სტარტაპის მთავარი ნიშა ნავთობპროდუქტებისგან ახალი ქიმიური ნივთიერებების მიღებაა. Twelve ნახშირორჟანგის ტრანსფორმაციით საწარმოო პროცესისთვის აუცილებელ ქიმიკატებს ამზადებს და კომპანიებს ნახშირორჟანგის ემისიის შემცირების საშუალებას აძლევს.
- BlocPower
კომპანია ამერიკაში საშუალო და დაბალშემოსავლიანი ოჯახებისთვის ბენზინსა და ბუნებრივ აირზე მომუშავე ტექნიკის თანამედროვე ენერგოეფექტიანი მოდელებით ჩანაცვლებაში ეხმარება. სტარტაპი ცდილობს, გაზარდოს სამიზნე ჯგუფების ეკოლოგიურად სუფთა ელექტროენერგიაზე წვდომა და წიაღისეულ საწვავზე მათი მოთხოვნა ამ გზით შეამციროს.
- Climate Trace
Climate Trace 2020 წელს რამდენიმე ორგანიზაციის მიერ შექმნილი კოალიციაა, რომელიც თითოეული ქვეყნის მიერ ატმოსფეროში გაშვებული სათბური აირების ნაკადების შესახებ მონაცემებს აგროვებს. 300-მდე სატელიტისა და 11 000 სენსორისგან მიღებული 59 ტრილიონი ბაიტის მოცულობის მონაცემები პლანეტის კლიმატისა და ნახშირორჟანგის ემისიის გეოგრაფიული განაწილების შესახებ ყოვლისმომცველ ინფორმაციას გვაძლევს.
- Watershed
2021 წელს შექმნილი სტარტაპი ისეთ მსხვილ კომპანიებს, როგორებიცაა Airbnb, Shopify, DoorDash და ა.შ., გარემოში მათი საქმიანობის შედეგად გამოყოფილი ნახშირორჟანგის გამოთვლაში ეხმარება. ამასთანავე, Watershed კომპანიებისთვის ნახშირორჟანგის ემისიის შემცირების სტრატეგიებსაც ქმნის და კლიენტებს სათბური აირების მენეჯმენტში ეხმარება.
- Doconomy
შვედურმა კომპანიამ გასული წლის სექტემბერში ინდივიდის გარემოზე ზემოქმედების გამოსათვლელი პროგრამა – Lifestyle Calculator შექმნა. პროგრამა დეტალური კითხვარის საფუძველზე ინდივიდის ცხოვრების სხვადასხვა ასპექტს აჯამებს და გარემოზე ყოველწლიურ გავლენას, მათ შორის, ნახშირორჟანგის ანაბეჭდსაც, ითვლის. Doconomy-მ მსგავსი კალკულატორი კერძო კომპანიებისა და ბრენდებისთვისაც შექმნა: 2030 Calculator სხვადასხვა სამომხმარებლო პროდუქტის წარმოებით შექმნილი ნახშირორჟანგის ანაბეჭდს მაღალი სიზუსტით ითვლის.
- Microsoft
ტექნოლოგიური გიგანტი Fast Company-ის რეიტინგში დასაქმებულთა შრომის, კოლაბორაციისა და პროდუქტიულობის შესახებ პანდემიის დროს ჩატარებული მასშტაბური კვლევების გამო მოხვდა. კომპანიამ გასულ წელს დასაქმებულთა შრომითი ცხოვრების ძირითად ტენდენციებზე ანგარიში გამოაქვეყნა, რომელიც 30 000-მდე ადამიანის გამოკითხვის, Microsoft 365-ისა და Linkedin-ის მონაცემების ანალიზსა და კომპანიის მიერ Human Factors Lab-ში ჩატარებულ კოგნიტიურ კვლევებს ეფუძნება. შედეგების გათვალისწინებით, Microsoft-მა თავის აპლიკაციებში ცვლილებები შეიტანა. მაგალითად, Outlook-ს შეხვედრის გადადების ფუნქცია დაემატა, რათა დისტანციურად დასაქმებულებს ონლაინშეხვედრებს შორის შესვენების საშუალება ჰქონდეთ.
- SpaceX
გასულ წელს კომპანიამ იაფი სარაკეტო ფრენების მიმართულებით მნიშვნელოვანი ნაბიჯები გადადგა. 2021 წელს რაკეტა Falcon 9-მ ჯამში 31 ფრენა შეასრულა. მათ შორის აღსანიშნავია ადამიანებით დაკომპლექტებული ეკიპაჟის გაგზავნა დედამიწის ორბიტაზე. კომპანიამ ეკიპაჟის თითოეული წევრის გამგზავრებაზე $55 მილიონი დახარჯა, როცა NASA-ს ეკიპაჟს თითოეული წევრის მგზავრობა $80 მილიონი უჯდება. SpaceX აეროკოსმოსურ სექტორში ფასების შემცირებისკენ ყოველწლიურად უფრო და უფრო შთამბეჭდავ შედეგებს აჩვენებს.
- Canva
ვიზუალური დიზაინის პლატფორმა ინოვაციური კომპანიების ათეულს ასრულებს. კომპანია მომხმარებლებს ფოტოს, ტექსტისა და ანიმაციის დიზაინის უფასო ვერსიებთან ერთად უკვე Pro და Enterprise ფასიანი კატეგორიების შეძენის საშუალებასაც აძლევს. Canva-ს ღირებულებამ გასულ წელს $40 მილიარდს მიაღწია, ხოლო მიმდინარე წლის პროგნოზით, მისი შემოსავლები $1 მილიარდს გადააჭარბებს.
