Agrolabs უკრაინული სტარტაპია, რომელიც ბავშვობის მეგობრებმა – მიხაელ ლაზარენკომ და მაქს გორინოვმა დააფუძნეს. კომპანია ჭკვიან მოწყობილობებს ქმნის, რომელთა მეშვეობითაც შესაძლებელია სათბურებში მცენარის განვითარების სრულ ციკლზე დაკვირვება და კონტროლი. შედეგად, ფერმერებს შეეძლებათ მაქსიმალურად სწორი აგრონომიული გადაწყვეტილებების მიღება.
რამდენიმე თვის წინ Agrolabs ერთ-ერთი უმსხვილესი სტარტაპაქსელერატორის – 500 Startups-ის გამარჯვებული გახდა. პროექტი საქართველოში ინოვაციებისა და ტექნოლოგიების სააგენტოს (GITA) ინიციატივით და საქართველოს ბანკის მხარდაჭერით, 500 Georgia-ს სახელით ხორციელდება. სწორედ ამიტომ, Agrolabs კალიფორნიაში, Silicon Valley-ზე იმყოფებოდა და მსოფლიოს უმსხვილეს ინვესტორებს შეხვდა. კომპანიის თანადამფუძნებელმა – მიხაელ ლაზარენკომ Business Feed-ის 7 შეკითხვას კალიფორნიის სამეცნიერო-ტექნოლოგიური ჰაბიდან უპასუხა:
- რა არის ამჟამად Agrolabs- ის ყველაზე დიდი გამოწვევა?
- ამჟამად, ჩვენი ყველაზე დიდი გამოწვევა გაყიდვების გაზრდაა. ვმუშაობთ, რომ ახალ ბაზრებზე შევიდეთ
- სად ხედავთ თქვენს თავს 10 წელიწადში?
- 10 წელიწადში ჩვენს სტარტაპს ვხედავ, როგორც წამყვან კომპანიას სათბურის მონაცემების ანალიზის მიმართულებით. ჩვენი მიზანია, დავეხმაროთ სხვადასხვა კომპანიას, იყვნენ უფრო ეფექტურები.
- რა არის Agrolabs-ის კონკურენტული უპირატესობა?
- ჩვენ შევიმუშავეთ IoT სენსორები, რომელიც მცენარის განვითარების მონიტორინგის შესაძლებლობას იძლევა. გარდა ამისა, შევიმუშავეთ ისეთი პროგრამა, რომელიც გვეხმარება უფრო სწრაფი და ეფექტური ეკონომიკური გადაწყვეტილებების მიღებაში.
- რას გააკეთებთ პირველი მილიარდის გამომუშავების შემდეგ?
- კვლავ გავაგრძელებთ შრომას.
- რა იყო თქვენი თავდაპირველი კაპიტალური ინვესტიცია სტარტაპის წამოწყებისას და რას ურჩევთ მას, ვისაც აქვს იდეები, თუმცა არ გააჩნია საკმარისი სახსრები მათ განსახორციელებლად?
- მე და ჩემმა პარტნიორმა Agrolabs წინა სამსახურებიდან დაგროვილი დანაზოგით დავიწყეთ. აღსანიშნავია, რომ დღეს დამწყები სტარტაპერებისთვის, რომელთაც იდეების განსახორციელებლად არ აქვთ საკმარისი სახსრები, არაერთი გრანტია ხელმისაწვდომი. ამიტომ, აუცილებლად ვურჩევდი ყველას, შეიტანონ განაცხადები მსგავს პროგრამებში. მაშინაც კი, თუ თქვენს ქვეყანაში არ არის მსგავსი გრანტები ხელმისაწვდომი, აუცილებლად გადახედეთ სხვა ქვეყნებში არსებულ შესაძლებლობებს.
- როგორი იყო თქვენი სამზადისი Silicon Valley-ზე გამგზავრებამდე?
- სანამ Silicon Valley-ზე გავემგზავრებოდით, შევადგინეთ იმ პოტენციური ინვესტორების სია, ვისითაც ყველაზე მეტად ვიყავით დაინტერესებული. ჩასვლის შემდეგაც აქტიურად გავაგრძელეთ იმ ადამიანების მოძიება, ვისთანაც შევძლებდით საკუთარი ბიზნეს იდეების განხილვას.
- რომელი წიგნის წაკითხვას ურჩევდით სტარტაპერებს?
- ჩემი აზრით, მნიშვნელოვანია იმ წიგნების კითხვა, რომლებიც დაკავშირებულია კონკრეტულად თქვენს ინდუსტრიასთან. არ არსებობს წარმატების რაიმე ზოგადი რეცეპტი, მაგრამ თუ თქვენ გაქვთ ღრმა ცოდნა თქვენი საქმიანობის მიმართულებით, აუცილებლად შეძლებთ ამ ცოდნის საფუძველზე წარმატების მიღწევას.
