საქართველოს ბანკის ციფრულ პროდუქტებს შორის მნიშვნელოვანია ფინანსური მენეჯერის მოდული – ფუნქციონალი, რომელიც ბიზნესმომხმარებელს კომპანიის ძირითადი ფინანსური ანალიტიკის ერთ სივრცეში ნახვის საშუალებას აძლევს.
საქართველოს ბანკის ციფრული საბანკო მომსახურების პროდუქტების მენეჯერი ცირა ლოლაძე Business Feed-თან საუბრისას ამბობს, რომ BFM (ფინანსური მენეჯერის მოდული) ინდმეწარმეებს, მცირე და საშუალო ორგანიზაციების დირექტორებსა და მენეჯმენტს კომპანიის ძირითადი ფინანსური სურათის აღქმას უმარტივებს. მათ შეუძლიათ, საკუთარი შემოსავლებისა და ხარჯების შესახებ მიიღონ სრული და დახარისხებული ინფორმაცია. შედეგად, ისინი უკეთესად გათვლიან სამომავლო ხარჯებს და დაგეგმავენ ფინანსურ ოპერაციებს:
„მეტი კომფორტისთვის, მოდულში მომხმარებელს აქვს ორი ტიპის − დათვალიერებისა და მართვის უფლება. შესაბამისად, მართვის უფლების გამოყენებით, მომხმარებელს შეუძლია თავად შექმნას სასურველი კატეგორიები და დაალაგოს ინფორმაცია მისი კომპანიისთვის მოსახერხებელი ფორმით.
ავტომატური კატეგორიზაციის მოდული გაუმარტივებს კომპანიებს დანახარჯების კონტროლს, შემოსავლის არხების იდენტიფიცირებასა და, ამ მონაცემებზე დაყრდნობით, შესაბამისი გადაწყვეტილებების მიღებას.
მოდული მოიცავს ოთხ ფუნქციონალს: ფინანსურ ანალიზს, ფულადი სახსრების დინამიკას, ამონაწერსა და ფინანსურ კალენდარს.
ფინანსური ანალიზის გვერდზე მომხმარებელს შეუძლია დაათვალიეროს სხვადასხვა სექტორის მიხედვით კატეგორიზებული ტრანზაქციები. (მაგალითად, ტრანსპორტი, კომუნალურები და ა.შ.). ტრანზაქციების ნახვა შესაძლებელია შემოსავლების, გასავლების, თვეებისა ან/და ანგარიშების ჭრილში.“
დინამიკის გვერდზე ბოლო 1 წლის ფულადი სახსრების დინამიკაა განთავსებული. მომხმარებელი თვეების ჭრილში შეძლებს დაათვალიეროს კომპანიის შემოსავლები, გასავლები და იხილოს ფინანსური დინამიკა. რაც შეეხება ამონაწერის გვერდს, აქ უკვე არა მხოლოდ პერიოდის, არამედ კატეგორიების, ანგარიშებისა და თანხების ჭრილშიც შეიძლება კონკრეტული ტრანზაქციების გაფილტვრა. მეოთხე ფუნქციონალი კი ფინანსური კალენდარია, სადაც ვიზუალურად, ფერების მიხედვით არის გამოსახული შემოსავლისა და გასავლის თანაფარდობა, რათა უფრო მარტივად აღქმადი იყოს. ამასთანავე, ინფორმაციის მიღება შესაძლებელია ყოველდღიურ, ყოველთვიურ და ყოველწლიურ ჭრილში.
ცირა ლოლაძე ამბობს, რომ მოდულის მეშვეობით მომხმარებელს შეუძლია წლის/თვის ჭრილში ყველაზე შემოსავლიანი და ხარჯიანი პერიოდების იდენტიფიცირება და ამის საფუძველზე შესაბამისი გადაწყვეტილებების მიღება.
ფინანსური მენეჯერის მოდული ძალიან დიდი კომფორტია საქმიანი ადამიანებისთვის, რომლებსაც სურთ, მუდმივად აკონტროლონ საკუთარი კომპანიის ფინანსები. მოდულის დახმარებით, იურიდიული პირები იღებენ უფრო ზუსტ ფინანსურ გადაწყვეტილებებს, რაც, საბოლოო ჯამში, კომპანიის შემოსავლის ზრდაზე აისახება.
