21-ე საუკუნის ერთ-ერთი ყველაზე პოპულარული და რეიტინგული სერიალის – სამეფო კარის თამაშების სამყარო სატელევიზიო ეთერში ბრუნდება!
ჯერ კიდევ 2019 წლის სექტემბერში HBO-მ დააანონსა, რომ შესაძლოა, შეექმნათ პროექტი, რომელიც ყველასათვის კარგად ნაცნობ პერსონაჟთა საგვარეულოს – ტარგარიანებს შეეხებოდა და GoT-ის ერთგული მაყურებლისათვის უკვე საყვარელი ამბის ერთგვარ წინარე ისტორიის როლს შეითავსებდა.
HBO-ს პროგრამირების პრეზიდენტი ქესი ბლოიზი ამბობს, რომ House of The Dragon-ის პრემიერის ზუსტი თარიღი ჯერ ცნობილი არაა, თუმცა, ფანები ვესტეროსის სამყაროში დაბრუნებას 2022 წლამდე არ უნდა ელოდნენ, რადგანაც სერიალის გადაღება 2021 წლამდე არ დაიწყება.
პროექტი ჯამში 10 ეპიზოდს მოიცავს, ხოლო მისი სიუჟეტი ჯორჯ მარტინის ახალი წიგნის – ცეცხლი და სისხლის მიხედვით შეიქმნება, რომელიც ავტორმა ორი წლის წინ გამოსცა. ნაწარმოებში დროითი ხაზი სამეფო კარის თამაშებიდან 300 წლით უკან ბრუნდება და ჩვენთვის უკვე ნაცნობი მოვლენების, ტარგარიანების სამოქალაქო ომისა და ვალირიის სამეფოს აღსასრულის შესახებ მოგვითხრობს.
როგორი მოლოდინები უნდა ჰქონდეს მაყურებელს?
სერიალის სცენარზე რაიან კონდალი იმუშავებს, რომელიც აქამდე აქტიურ მონაწილეობას იღებდა სამეფო კარის თამაშების შექმნაშიც. ასევე, მის გუნდში სარა ლი ჰესსაც შევხვდებით, რომელიც გახმაურებული სერიალების – House-ისა და Orange is The New Black-ის სცენარისტია.
ცნობილია, ასევე, რამდენიმე ეპიზოდის რეჟისორის ვინაობაც – GoT-ის ფანებისთვის უკვე კარგად ნაცნობი, ემის ჯილდოს მფლობელი, მიგელ საპოჩნიკი. რეჟისორს სერიალისთვის ისეთი პოპულარული ეპიზოდები აქვს შექმნილი, როგორებიცაა Hardhome, The Long Night და Battle of The Bastards.
რაც შეეხება როლებს, მათზე მსახიობთა გარკვეული ნაწილი უკვე დაამტკიცეს. სერიალში მთავარი პერსონაჟის – მეფე ვისერისის როლს პედი კონსიდაინი შეასრულებს, რომელმაც მაყურებელს თავი Peaky Blinders-იდან უკვე კარგად დაამახსოვრა. სხვა მნიშვნელოვან როლებს კი ოლივია ქუქი, მეტ სმიტი და ემა დ’არსი გაინაწილებენ.
სამეფო კარის თამაშები მსოფლიოს მრავალი მაყურებლის ფავორიტი შოუა. მისი უკანასკნელი სეზონი 2019 წელს დასრულდა და დიდი ვნებათაღელვაც გამოიწვია. მას შემდეგ მაყურებელი გამუდმებით ელოდებოდა რამე სიახლეს სერიალის პრიქველის ან გაგრძელების შესახებ, რაც HBO-მ გაითვალისწინა და ფანებს წლის ბოლოს House of The Dragon-ის შესახებ გაუმხილა.
