საქართველოს ინოვაციების და ტექნოლოგიების სააგენტომ (GITA) 100 000-ლარიანი თანადაფინანსების გრანტების პროგრამის გამარჯვებული 20 სტარტაპი გამოავლინა. გადაწყვეტილება საინვესტიციო კომიტეტმა მიიღო, რომელიც დაკომპლექტებულია მაღალი დონის საერთაშორისო ვენჩორული ინვესტორების მიერ: ბილ რაიჰართი, ჯონათან თაუერი, მარვინ ლიაო, სტივ ადელმანი და ტიმ ვაგნერი.
ერთ-ერთი გამარჯვებული Agronavti გახლავთ. აპლიკაციის მიზანია აგროსექტორში ციფრული ტექნოლოგიების დანერგვა და ამ გზით ინფორმაციის სწრაფად გავრცელებისა და გაყიდვის ბაზრების მოძიების უზრუნველყოფა:
„ვფიქრობ, ჩვენი აპლიკაცია Agronavti საერთაშორისო ბაზარზე თავის სათქმელს აუცილებლად იტყვის. კორონავირუსმა სასურსათო უსაფრთხოების სერიოზული გამოწვევები გვაჩვენა. ქვეყნები იმპორტზე არიან დამოკიდებულები და ბევრმა მათგანმა ექსპორტი შეაჩერა. ჩვენი აპლიკაცია ფერმერებს პროდუქციის განთავსებისა და რეალიზაციის საშუალებას აძლევს.“ – ამბობს ნინო ზამბახიძე, Agronavti-ის დამფუძნებელი.
გამარჯვებული სტარტაპები ერთმანეთისგან განსხვავდებიან და თითოეული მათგანი კონკრეტული სეგმენტისთვისაა განკუთვნილი. მაგალითად, Rajdeba.ge ავტოსესხების შედარების პლატფორმაა, სადაც სხვადასხვა ავტომობილის ფასებია თავმოყრილი. მომხმარებლებს საშუალება აქვთ რამდენიმე საფინანსო ორგანიზაციაში გააგზავნონ ლიზინგის განაცხადი, შეადარონ და მიიღონ მათზე მორგებული პირობები. Keto Diet App წონის კორექტირების აპლიკაციაა, რომელიც ჯანსაღი და ინდივიდუალურად შერჩეული რაციონის დაგეგმვას გვთავაზობს. Cyber-Lawyer კი იურიდიული დოკუმენტების მომზადების ონლაინპლატფორმაა, რომელიც იურისტის მონაწილეობის გარეშე შესაბამის ინფორმაციას უფრო ხელმისაწვდომს გახდის.
პროგრამის შესახებ: GITA თანადაფინანსების პროგრამას მსოფლიო ბანკის პროექტის ეროვნული ინოვაციების ეკოსისტემის (GENIE) ფარგლებში ახორციელებს. 100 000-ლარიანი გრანტი საქართველოში რეგისტრირებული იმ კერძო და მცირე საწარმოებისთვისაა განკუთვნილი, რომელთა რეგისტრაციიდან ორ წელზე ნაკლებია გასული. განაცხადის შეტანა რეგისტრაციის არმქონე ფიზიკურ პირებს ან ფიზიკურ პირთა ჯგუფებსაც შეუძლიათ.
მიზანი: საქართველოში საერთაშორისო პოტენციალის მქონე ინოვაციური პროდუქტებისა და მომსახურების შემუშავება, მათი კომერციალიზაცია და ინოვაციური საწარმოების შექმნის სტიმულირება.
პროცედურა: გრანტების პროგრამის გამოცხადებისას უნდა დარეგისტრირდეთ ვებპორტალზე, შეავსოთ განმცხადებლის სარეგისტრაციო ფორმა, სადაც კომპანიის ძირითადი რეკვიზიტებს მიუთითებთ (მაგალითად, გადამხდელის საიდენტიფიკაციო ნომერი, სამართლებრივი ფორმა, მისამართი, საკონტაქტო პირის რეკვიზიტები და სხვა).
განცხადებები შემდეგი კრიტერიუმებით ფასდება:
- გუნდი
- ბაზრის მოცულობა/მასშტაბი/შესაძლებლობა
- დრო/შემოსავალი
- კონკურენტული უპირატესობა
- პროდუქტი/ტექნოლოგია
აღსანიშნია, რომ თანადაფინანსების გრანტების პროგრამის ფარგლებში უკვე დაფინანსებულია 78 სტარტაპი. პროგრამა დაფინანსების ერთ-ერთ ყველაზე მეტად გავრცელებულ ინსტრუმენტს წარმოადგენს, რომელსაც როგორც განვითარებული, ისე განვითარებადი ეკონომიკის მქონე ქვეყნებში იყენებენ.
