ბანკი შენს ტელეფონში სულ უფრო სრულყოფილი და ფუნქციური ხდება. დისტანციური არხების განვითარება ციფრულ ეპოქაში საქართველოს ბანკის მთავარ პრიორიტეტებს შორისაა. ამიტომ მარტივი და დროის დამზოგავი ფუნქციებით მობილბანკში მუდმივი განახლებებია.
თუ საქართველოს ბანკის მომხმარებელი ხართ, ეს სიახლეები სწორედ თქვენთვისაა.
მირჩიე ანაბარი განახლებული მობილბანკის ერთ-ერთი მთავარი ფუნქციონალია. მობილბანკში ანაბრის შექმნის პროცესი კიდევ უფრო მარტივდება. სასურველი ანაბრის შესარჩევად მხოლოდ რამდენიმე კითხვაზე პასუხია საჭირო. პასუხების მიხედვით, აპლიკაციის ალგორითმი მომხმარებელს მის საჭიროებებზე მორგებულ ანაბარს შესთავაზებს.
აპლიკაციაში ასევე შესაძლებელია, მომხმარებელმა მისთვის რელევანტური ანაბრის პირობები შეადაროს სხვა სახის ანაბრებსაც. შედეგად, ის მარტივად გადაწყვეტს, რა ტიპის ანაბარია მისთვის ყველაზე მომგებიანი.
გზავნილების გვერდს მობილბანკში ორი მთავარი სიახლე აქვს:
- მომხმარებელს არასავალდებულო ველების შევსება აღარ მოუწევს (გამომგზავნი ქვეყნისა და გზავნილის თანხის მითითება)
- შეიცვალა თანხის კონვერტაციის პროცედურა
„ცვლილებამდე მომხმარებელი ჯერ ირჩევდა ანგარიშს და თუ გზავნილის ვალუტისგან განსხვავებული ვალუტის ანგარიშს უთითებდა, ავტომატურად ხდებოდა კონვერტაცია. ახლა კონვერტაციის შესაძლებლობა ბევრად ცხადი გახდა: გზავნილის კოდის შეყვანის შემდეგ გამოჩნდება თანხა და მისი ეკვივალენტები სხვადასხვა ვალუტაში. შესაბამისად, მომხმარებელს იქვე შეუძლია აირჩიოს, რა ვალუტაში სურს გზავნილის მიღება ან კონვერტაცია“, – განუმარტეს Business Feed-ს საქართველოს ბანკში.
პროდუქტების გვერდი
მობილურ აპლიკაციებში ვიზუალს დიდი მნიშვნელობა აქვს. მომხმარებელმა მარტივად უნდა შეძლოს მობილურ მოწყობილობაში სასურველი პროდუქტისა და მომსახურების მოძებნა. პროდუქტების გვერდის განახლება ვიზუალის ცვლილებას ეხება. თუ აქამდე თითოეული პროდუქტის სანახავად გვერდების ჩამოშლა იყო საჭირო, ახლა შუალედური გვერდი გაჩნდა. მაგალითად, თუ მომხმარებელს რამდენიმე ანგარიში აქვს, შუალედურ გვერდზე შეძლებს როგორც ჯამური თანხის, ასევე თითოეულ ანგარიშის ცალ-ცალკე ნახვას.
ციფრული პროდუქტების განვითარება და მობილბანკის განახლებული ფუნქციები საქართველოს ბანკის სულ უფრო მეტ მომხმარებელს უბიძგებს საბანკო მომსახურების დისტანციურად მიღებისკენ.
