ოქროს გლობუსის დაჯილდოებაზე წარდგენილი ნომინანტების სია 3 თებერვალს გახდა ცნობილი და დიდი ვნებათაღელვაც გამოიწვია.
საუკეთესო ფილმის კატეგორიაში სიურპრიზებს ადგილი არ ჰქონია. ნომინაციები კი კრიტიკოსთა ფავორიტებს შორის განაწილდა. მთავარი პრიზისთვის ერთმანეთს The Father, Mank, Nomadland, Promising Young Woman და The Trial of Chicago 7 დაუპირისპირდებიან. დიდი მითქმა-მოთქმა გამოიწვია სიაში ისეთი ფილმების არყოფნამ, როგორებიცაა Minari და Da 5 Bloods.
რაც შეეხება საუკეთესო რეჟისორის ნომინაციას, პირველად ღონისძიების ისტორიაში, წარდგენილ კანდიდატებს შორის სამ ქალს შევხვდებით. რეჯინა კინგის, ქლოი ჟაოსა და ემერალდ ფენელის ნამუშევრებმა უკვე საკმაო აღიარება მოიპოვეს. ეს მიღწევა უფრო შთამბეჭდავი გახდება, თუ იმასაც გავითვალისწინებთ, რომ აქამდე ამ ნომინაციაში სულ 5 რეჟისორი ქალი იყო წარდგენილი. ქალ კოლეგებთან ერთად, მთავარი პრიზის მოპოვებას დევიდ ფინჩერი და აარონ სორკინიც შეეცდებიან.
საუკეთესო მსახიობი კაცის ჯილდოსთვის რიზ აჰმედი, ენტონი ჰოპკინსი, ჩედვიკ ბოუზმენი, გერი ოლდმენი და ტაჰარ რაჰიმი იბრძოლებენ. აღსანიშნავია ისიც, რომ ტაჰარ რაჰიმის სიაში გამოჩენას ექსპერტების და თავად ფრანგი მსახიობის გაოცებაც მოჰყვა. ნაკლებად ცნობილი მსახიობისთვის ეს პირველი დიდი წარმატებაა, რომლის შესახებაც თავადაც სამსახურში ყოფნისას მეგობრისგან შეიტყო.
რაც შეეხება მთავარი როლის შემსრულებელ ქალ მსახიობებს – გამოცდილ ვაიოლა დეივისსა და ფრენსის მაკდორმანდს ანდრა დეი, ვანესა კირბი და ქერი მალიგანი შეუერთდნენ. ამ კატეგორიაში კონკურენცია მძაფრია და ბევრს უჭირს ცალსახა ფავორიტის დასახელება.
ოქროს გლობუსის დაჯილდოების რიგით 78-ე ცერემონია 28 თებერვალს გაიმართება.
