რუბრიკას წარმოგიდგენთ გალტ&თაგარტი
იმისათვის, რომ გავიგოთ, რა ხდება საფონდო ბაზარზე, პირველ რიგში, Dow Jones-ის, S&P 500-ისა და Nasdaq-ის ინდექსებს უნდა შევხედოთ.
ინფლაციამ, საპროცენტო განაკვეთების ზრდამ და რუსეთის უკრაინაში შეჭრამ საფონდო ბირჟაზე არასტაბილურობის მორიგი ტალღა წარმოქმნა. 2022 წლის დასაწყისიდან, 5 თვის განმავლობაში, S&P 500 16%-ზე მეტით დაეცა, Nasdaq – 28%-ით. ზარალი განიცადა Dow Jones-მაც.
ინფლაციის სწრაფი ზრდა რომ შეეჩერებინა, ფედერალურმა სარეზერვო სისტემამ (Fed) საპროცენტო განაკვეთები გაზარდა. მისმა ასეთმა მოქმედებამ ბაზარზე სიტუაცია შემოაბრუნა – გასულ კვირას S&P 500-მა, Dow Jones-მა და Nasdaq-მა წაგების სერია შეწყვიტეს და მცირედით მოიმატეს.
Fed კვლავ აგრესიული მონეტარული პოლიტიკით აპირებს მზარდი ინფლაციის შემცირებას და მალე განაკვეთი შესაძლოა, კიდევ გაზარდოს. ეს შეანელებს ინფლაციას, მაგრამ შეზღუდავს ბიზნესსა და მომხმარებლებს და შეიძლება, აშშ-ში მორიგი ეკონომიკური რეცესიაც გამოიწვიოს.
რა მოხდება 2022 წლის დარჩენილ პერიოდში? გააგრძელებს თუ არა ბაზარი ვარდნას და მოხდება თუ არა კიდევ ერთი რეცესია?
„მიუხედავად იმისა, რომ ეკონომიკის რეცესიის ალბათობა მნიშვნელოვნად გაიზარდა, ჩვენ მომდევნო 12 თვის განმავლობაში მის ალბათობას არ განვიხილავთ. ვვარაუდობთ, რომ გლობალური ზრდა 1.3%-დან 3.1%-მდე იქნება“, – განაცხადა წინა კვირას JPMorgan-მა.
ბანკის შეფასებით, მოსალოდნელ ეკონომიკურ ზრდას დიდწილად ჩინეთი განაპირობებს. თუ პანდემიის გამო შეზღუდვები არ განახლდება, ჩინეთის ეკონომიკა წლის მეორე ნახევარში 7.5%-ით გაიზრდება. JPMorgan ვარაუდობს, რომ ჩინეთში მაღალი ზრდა სხვა განვითარებადი ქვეყნების ბაზრებს გადაეცემა.
ბანკი ელოდება, რომ წლიური ინფლაციის მაჩვენებელი მომდევნო რამდენიმე თვის განმავლობაში განახევრდება, კერძოდ, 9.4%-დან 4.2%-მდე ჩამოვა. ინფლაციის მკვეთრი ვარდნა რუსეთსა და უკრაინას შორის ცეცხლის შეწყვეტის შემთხვევაში მოხდება, რასაც JPMorgan წლის მეორე ნახევარში ვარაუდობს, რადგან ომის ეკონომიკური რესურსები სრულად იქნება რეალიზებული ბევრი ქვეყნისთვის, მათ შორის რუსეთისთვის.
„ინფლაციის შემცირება ცენტრალურ ბანკებს საშუალებას მისცემს, თავიდან აიცილონ ეკონომიკური ვარდნა“, – მიიჩნევს JPMorgan.
რა მოხდება საფონდო ბაზარზე?
ზუსტი პროგნოზირება რთულია, თუმცა, JPMorgan ვარაუდობს, რომ, საფონდო ბაზარი მზად არის, წინა თვეებში განცდილი ზარალი აინაზღაუროს.
„ინვესტორები წლის მეორე ნახევარში უნდა მოემზადონ საფონდო ბირჟაზე აქციების ზრდისთვის, რადგან აშშ-ის ეკონომიკა თავიდან აიცილებს რეცესიას”, – აღნიშნავს JPMorgan.
ამის თქმის საფუძველს მათ აძლევს ის გარემოება, რომ პანდემიით გამოწვეული კრიზისი შემსუბუქდა, მეტი ოპტიმიზმი გაჩნდა, ხალხმა დაიწყო გარეთ გასვლა და ფულის ხარჯვა. სპეციალისტები ვარაუდობენ, რომ ტექნოლოგიების, ელექტრონული კომერციისა და ბიოტექნიკის სფეროები გააგრძელებენ ზრდას, რაც ინვესტორებს თავდაჯერებულობის საფუძველს მისცემს.
უფრო ფრთხილი ექსპერტების აზრით კი, „მიუხედავად იმისა, რომ საფონდო ბაზარმა დაიწყო აღდგენა, ინფლაცია, ნავთობის მაღალი ფასები და გეოპოლიტიკური დაძაბულობა, არ გამქრალა”. ეს ფაქტორები ინვესტორებს საფონდო ბირჟაზე სიფრთხილის გამოჩენისკენ უბიძგებს
ასე რომ, ინვესტორები მომავალში ყველანაირი სცენარისთვის მზად უნდა იყვნენ.
გასულ წელს საქართველოს ბანკმა Galt&Taggart–თან თანამშრომლობით შექმნა ინვესტირების სპეციალური პლატფორმა, რომელიც მობილბანკითაა ხელმისაწვდომი და მომხმარებელს ამერიკულ საფონდო ბირჟებზე ათასობით კომპანიის აქციითა და ფასიანი ქაღალდით ვაჭრობის შესაძლებლობას აძლევს. ინვესტორების დაწყება კი 1 დოლარითაცაა შესაძლებელი.
ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენ მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
