Business Feed იწყებს ახალი სტატიების სერიას, რომლითაც ერთგულ მკითხველებს სხვადასხვა სფეროს პროფესიონალების გამოცდილებებსა და სასარგებლო რჩევებს გაუზიარებს. თქვენ შეიტყობთ იმ გამოწვევებზე, რომელსაც ყოველდღიურ საქმიანობაში სხვადასხვა ინდუსტრიაში მოღვაწე პროფესიონალები აწყდებიან. ამჯერად ჩვენ ინტერესის სფეროს ციფრული მარკეტინგი და ქართულ რეალობაში მისი როლი წარმოადგენს.
დიდი ხანი არაა, რაც ქართულ ბაზარზე სარეკლამო ინდუსტრია არსებობს. თუმცა, ცალსახაა, რომ დღითი დღე ვითარდება. ქართულმა პროდუქციამ საერთაშორისო ასპარეზზე არაერთი ჯილდოც დაიმსახურა. დღეს საქართველოში შევხვდებით როგორც ე.წ. ტრადიციულ, ასევე ციფრულ სააგენტოებს. ტრადიციული სააგენტოები მხოლოდ ნაცნობი საკომუნიკაციო არხებისთვის (გარე სივრცე, ტელევიზია, რადიო, ბეჭდვითი მედია) ქმნიან პროდუქტს. რაც შეეხება ციფრულ არხებს, ის მოიცავს ყველაფერს, რასთანაც ინტერნეტი და ტექნოლოგიები გვაკავშირებს.
დღეს უფრო და უფრო მეტი კომპანია სარგებლობს ციფრული სააგენტოების მომსახურებით, გამონაკლისი არც საქართველოა და მსგავსი ტრენდი ქართულ ბაზარზეც შეიმჩნევა.
Business Feed დაინტერესდა, თუ რას საქმიანობენ დღეს ქართული ციფრული სააგენტოები და REDBERRY-ის აღმასრულებელ დირექტორს – ლევან კეცხოველს გაესაუბრა:
„კომპანიების უმეტესობა პანდემიამდე მიჩვეული იყო საკუთარი პროდუქციის ტრადიციული საკომუნიკაციო არხებით გაყიდვას, ისეთებით, როგორებიც კომერციული ობიექტებია. დღევანდელმა რეალობამ კი ცალსახად დაანახათ ციფრული მარკეტინგის გამოყენების საჭიროება, იქნება ეს ანალიზური თუ სარეკლამო მომსახურება.“
ლევანი ამბობს, რომ ქართველი მომხმარებელი, ისევე როგორც ინდუსტრია, ვითარდება და ბაზარზე უკვე ბევრი პროფესიონალიც ჩნდება:
„საქართველოში კლიენტთა პალიტრა ძალიან მრავალფეროვანია. ვხვდებით ბევრ რისკიან კომპანიას, რომლებსაც რაიმე ახლის გაკეთება სურთ და ბოლომდე მოგვყვებიან იდეის შესრულებისას. ამასთან, არიან კონსერვატიული კომპანიებიც, რომლებსაც ნაცნობი გზებით ურჩევნიათ ფუნქციონირება. მუშაობა გვიწევს ნაკლებკომპეტენტურ კლიენტებთანაც, რომელთაც ადრე მსგავსი გამოცდილებაც არ ჰქონიათ. თუმცა, იმის თქმა დანამდვილებით შეგვიძლია, რომ სარეკლამო ინდუსტრიასთან ერთად მისი კლიენტებიც ვითარდებიან. სფეროში იმატებს დასაქმებულთა რაოდენობაც და ჩნდება საქმის მეტი პროფესიონალიც.“
როგორც ყველგან, სარეკლამო ინდუსტრიაშიც არსებობს პრობლემები. ლევან კეცხოველის აზრით, საქართველოში, ისევე როგორც ბევრ ქვეყანაში, შესაცვლელია დამოკიდებულება მარკეტინგის მენეჯერების მიმართ :
„ჩემი აზრით, საქართველოშიც და არამარტო ჩვენთან, აღმასრულებელ დონეზე მყოფ კადრებს შორის, CMO (მარკეტინგის აღმასრულებელი დირექტორი), ყველაზე ადვილად მოწყვლადია. ხშირად კომპანიებში მარკეტინგის მენეჯერებს არ მიიჩნევენ იმდენად მნიშვნელოვნად, რამდენადაც ისინი სინამდვილეში არიან. შესაბამისად, გადაწყვეტილებების მიღებისას, მათ ხშირად სჭირდებათ ზედა რგოლებისგან თანხმობა. ამის გამო ქართველი მარკეტერები ბევრ საკითხში ფრთხილობენ და იზღუდებიან. ამასთან მიმაჩნია, რომ სააგენტოებისთვის ერთგვარი გამოწვევაცაა CMO-ებისთვის ზურგის გამაგრება და ამ საკითხზე ჩვენც უნდა ვიმუშაოთ. თუმცა, წინა წლებთან შედარებით, პროგრესი ცალსახაა და სიტუაციაც მიმაჩნია, რომ უკეთესობისკენ იცვლება.“
საინტერესოა, როგორ იგეგმება საქართველოში სარეკლამო კამპანია. ლევანმა კამპანიის შექმნის ყველა ეტაპზე ისაუბრა:
„თავდაპირველად ჩვენთან მოდის ბრიფი, რომლიდანაც ვეცნობით იმას, თუ რა სურს ჩვენგან კლიენტს. ამას მოსდევს პირველი შეხვედრა, რაც მოიცავს „დებრიფს“ ანუ საწყის განხილვას. ამ ეტაპზე საჭიროა საქმიანობაში ჩაერთოს როგორც სტრატეგი, ასევე ექაუნთმენეჯერი და კრეატიული დირექტორი. რა თქმა უნდა, ყველაფერი დამოკიდებულია კამპანიას მასშტაბებზეც.
პირველ რიგში, გუნდის სტრატეგი იწყებს კვლევას, როგორც დამკვეთ კომპანიაზე, ასევე მის ინდუსტრიასა და არსებულ ბაზარზე. ამ პროცესში მთავარია ე.წ. „ინსაითები“, გნებავთ, მიგნებების მოძიება, რის მიხედვითაც ბრიფში დასმული კონკრეტული პრობლემა გადაიჭრება. სტრატეგის როლია, გუნდს დაუსახოს მიმართულება, რომლის მიხედვითაც ისინი ბრიფისათვის კრეატიულ გადაწყვეტილებას მოიფიქრებენ.
რაც შეეხება შესრულებას, აქ საქმეში უკვე ერთვება როგორც ქოფირაითერი, ასევე არტდირექტორი, გრაფიკული დიზაინერი და ყველა სხვა საჭირო პროფესიის ადამიანიც. იკვრება გუნდი, რომელიც იწყებს დეტალური სამუშაო გეგმის განხორციელებას. ამ პროცესში კლიენტთან შუალედური შეხვედრებიც ხშირია – კრეატიული გუნდისთვის საჭირო დეტალების დასაზუსტებლად.
სანამ საბოლოო პროდუქტამდე მივალთ, გუნდი დამკვეთს წარუდგენს საკუთარ იდეას. ეს გამოიხატება ერთი ან რამდენიმე სატესტო ვერსიის პრეზენტაციით. კლიენტი ამტკიცებს ან უარყოფს შეთავაზებულ მიმართულებას, რასაც მოსდევს მთავარ სტადიაზე გადასვლა.
საბოლოო ეტაპი უკვე კონცეფციის მედიაზე ჩაშლასა და იდეის იმპლემენტაციას მოიცავს. ეს შეიძლება იყოს როგორც ვიდეოპროდუქციის შექმნა, ასევე სხვა ნებისმიერი სახის კონტენტის აქტუალიზაცია.“
ყველა პროექტი ახალ გამოცდილებასა და ცოდნას ტოვებს, მაგრამ ყველაზე განსხვავებული და სასიამოვნო ემოციები სარისკო პროექტებზე მუშაობას მოაქვს:
„ნებისმიერ კამპანიაზე მუშაობით სწავლობ ისეთ რამეს, რაც აქამდე არ იცოდი. ჩემთვის ყველაზე სასიამოვნო სარისკო პროექტებზე მუშაობაა, რომლის წარმატებით განხორციელებაც დიდი გამოწვევაა. საბოლოოდ, ყველაზე დიდი შედეგი სწორედ მათ მოაქვთ ხოლმე.
მსგავსი გამოცდილება მქონდა, ლუდის მწარმოებელი კომპანია აისის 2018 წელს განხორციელებულ კამპანიაზე (#გააგონეჰიმნი) მუშაობისას. პროექტი საქართველოს რაგბის ნაკრების იტალიაში ჩატარებული მატჩის გამართვამდე ცოტა ხნით ადრე შეიქმნა.
მუშაობის დაწყებისას, საბოლოო იდეის ჩამოყალიბების შემდეგ, არავის სჯეროდა, რომ მისი სიცხადეში მოყვანა შესაძლებელი იქნებოდა. არსებობდა უამრავი წინაღობა. პირველ რიგში, იდეის წარმატებაში უნდა დაგვერწმუნებინა კლიენტი. შემდეგ მის განსახორციელებლად უნდა დაგვეთანხმებინა არა მარტო საქართველოს, არამედ იტალიის რაგბის კავშირიც. და თუ ეს ყოველივე გეგმის მიხედვით წავიდოდა, ძალიან მოკლე დროში 10 000 კაცი უნდა შეგვეკრიბა, რომლებიც საქართველოს ჰიმნს ერთად იმღერებდნენ. ამ ყველაფრისთვის კი დრო მხოლოდ 3 კვირა გვქონდა. ამასთან გამოყოფილი ბიუჯეტიც მინიმალური იყო. ამ პროექტმა დამანახვა, რომ თუ რაიმე იდეის მართლა გჯერა და ბოლომდე მომართული ხარ რომ გამოვიდეს, აუცილებლად გამოვა.“
