მსოფლიო პანდემიამ ყოველდღიური ცხოვრების სტილის მიმართ შეხედულებები და დამოკიდებულებები რომ შეცვალა, ამაზე, ალბათ, ყველა ვთანხმდებით. შეცვლილ რეალობაში განსხვავებული მიდგომების დანერგვა გახდა საჭირო.
ნიკა ჟღერია და ლაშა ბაქრაძე ის ადამიანები არიან, რომლებიც ამტკიცებენ, რომ ყველაზე რთულ გარემო პირობებთანაც კი შეიძლება ადაპტირება და წარმატებული ბიზნესის შექმნა.
მათი იდეა ცენტრალიზებულ სამზარეულოს მოიცავს, სადაც სარესტორნო ბიზნესით დაინტერესებულ ადამიანებს შეუძლიათ, 2 კვირაში ნულოვანი დანახარჯებით ონლაინრესტორანი გახსნან.
თუ გაქვთ კვების ობიექტი, რომელიც მომხმარებელს მიტანის სერვისით უზრუნველყოფს და გსურთ, სამზარეულოზე პასუხისმგებლობა, თანამშრომლების დატრენინგება და დანადგარების ყიდვა არ გიწევდეთ, ახლა უკვე შეგიძლიათ VidooFood–ს მიმართოთ.
„VidooFood–მდე იყო მექსიკური რესტორანი, რომელიც მეგობრებმა პანდემიის დროს გავხსენით და რომელიც მხოლოდ მიტანის სერვისზე მუშაობდა. აღნიშნულ პერიოდში აღმოვაჩინეთ, რომ ჩვენს სამზარეულოს გაცილებით მეტი შეეძლო. რა დროსაც სატესტოდ დავამატეთ უზბეკური რესტორანი. ამ ექსპერიმენტის წარმატებით დასრულების შემდეგ დავიწყეთ კონცეფციაზე ფიქრი, რომელიც უკვე სხვებს მისცემდა საკუთარი ონლაინრესტორნის შექმნის შესაძლებლობას“, ̶ გვიყვება ნიკა ჟღერია.
ნიკა და ლაშა Shark Tank საქართველოს გამარჯვებულები არიან. მათ ბიზნესის განვითარებისთვის 250 000 ლარის ინვესტიცია მოიპოვეს:
„Shark Tank–მდე იყო ჯიტას 100 000-იანი გრანტი, რომელიც დაგვეხმარა, ჩვენი სამზარეულო გაგვეორმაგებინა და საკუთარ შესაძლებლობების კიდევ უფრო მეტი რწმენა მოგვცა.
VidooFood–ში 250 000 ლარის ინვესტიცია მენი ბენიშმა და ქეთი ქვარცხავამ განახორციელეს, რის სანაცვლოდაც კომპანიის 50%-იანი წილი მიიღეს“.
მიღებული ინვესტიცია VidooFood–ს გაფართოებაში დაეხმარება, რის შედეგადაც ნიკა და ლაშა დამატებით 50 რესტორნის მომსახურებას შეძლებენ.
„ინვესტიცია დაიხარჯება ახალი ლოკაციის დასამატებლად, რომლის სამზარეულო 4-5-ჯერ უფრო დიდი იქნება, ვიდრე ჩვენი არსებული სამზარეულოს ფართია. ეს საშუალებას მოგვცემს, დაახლოებით 50-მდე რესტორანს მოვემსახუროთ ჩვენი ახალი ლოკაციიდან“, ̶ აღნიშნავს ნიკა Business Feed–თან საუბარში.
ნიკა და ლაშა სამომავლოდ დიდ სიახლეებს გვპირდებიან:
„საკმაოდ საინტერესო სიახლეები გველის წლის მეორე ნახევრიდან, რასაც ჯერჯერობით საიდუმლოდ დავტოვებთ. თუმცა, დარწმუნებული ვართ, ეს სიახლეები ბიზნესების გარდა უკვე საცალო მომხმარებლებსაც ძალიან გაახარებთ.“
შეგახსენებთ, SONY Pictures–ის რეალითი შოუ – Shark Tank ერთ–ერთი ყველაზე პოპულარული შოუა, რომელიც უკვე 13 სეზონია, მაყურებლების ფავორიტ გადაცემად რჩება. საქართველოს პირველ არხზე Shark Tank საქართველოს გენერალური პარტნიორი საქართველოს ბანკია. 4 ემის მფლობელი შოუ საქართველოს სატელევიზიო სივრცეში პირველად გამოჩნდა და პირველი სეზონი წარმატებითაც დაასრულა. ახლა კი Shark Tank საქართველო ახალ მონაწილეებს ელის.
