მეტყველების ტექნოლოგია ხელოვნური ინტელექტის ერთ-ერთი მიმართულებაა, რომლის მიზანიც ადამიანის მიერ ნათქვამის გაგება და დამუშავებაა. ამის ყველაზე თვალსაჩინო მაგალითებია Amazon Alexa, Apple Siri და Google Assistant.
ხმოვანი ასისტენტების ათვისება ყოველწლიურად იზრდება. ზრდა განსაკუთრებით შეინიშნება ახალგაზრდა მომხმარებლებში.
საქართველოს ბანკმა გადაწყვიტა, განავითაროს ქართული მეტყველების ტექნოლოგიები. საბოლოო მიზანი ქართული ხმოვანი ასისტენტის შექმნაა. ამ მიმართულებით საქართველოს ბანკს ჩატბოტის სახით უკვე დიდი პროგრესი აქვს.
ქართული მეტყველების ტექნოლოგიების განვითარების შესახებ საქართველოს ბანკის მონაცემთა წამყვანი მეცნიერი ნიკოლოზ მამისაშვილი საუბრობს:
„საქართველოს ბანკში ხელოვნური ინტელექტის განვითარების ერთ–ერთ პრიორიტეტულ მიმართულებას სწორედ მეტყველების ტექნოლოგიები წარმოადგენს. ჩვენი მიზანია, ერთი მხრივ, გავუმარტივოთ ჩვენს მომხმარებელს საბანკო სერვისების მიღება, ხოლო მეორე მხრივ − ხელი შევუწყოთ ქართული ენის ციფრულ ეპოქაში ინტეგრირებას“.
ნიკოლოზ მამისაშვილი ამ მიმართულებით არსებულ პროგრესზე ამახვილებს ყურადღებას:
„საქართველოს ბანკს მეტყველების ტექნოლოგიებში მნიშვნელოვანი პროგრესი აქვს სამ ძირითად კომპონენტში, ესენია:
- Speech to text
- Natural language understanding
- Question answering
სწორედ ამ კომპონენტებზეა აგებული ჩატბოტი, რომელიც დღიურად ათობით ათას დიალოგს ემსახურება. ჩატბოტის დახმარებით, მომხმარებელს შეუძლია, შეუკვეთოს ბარათი ან თუნდაც დაბლოკოს იგი დაკარგვის შემთხვევაში, ან მოითხოვოს საბანკო ამონაწერი. ჩატბოტს მრავალი ასეთი სერვისი აქვს, რომელიც ოპერატორის დახმარების გარეშე შეიძლება განხორციელდეს. ეს ბევრად კომფორტულს ხდის ციფრული არხებით სარგებლობას“.
როგორც ბანკის მონაცემთა წამყვანი მეცნიერი განმარტავს, საქართველოს ბანკის საბოლოო მიზანია, შექმნას ხმოვანი ასისტენტი:
„ციფრული ხმოვანი ასისტენტის შექმნა საკმაოდ კომპლექსური ამოცანაა. თავად ტექნოლოგიური გიგანტების მიერ შექმნილ ხმოვან ასისტენტებსაც კი, რომლებიც ინგლისური ენისთვის არის აგებული, ადამიანის მსგავსად დიალოგის წარმართვამდე ბევრი აკლიათ. ქართულისთვის კი შესაბამისი ინსტრუმენტები და მონაცემები ბევრად მცირეა და შესაბამისად, უფრო რთულია ხარისხიანი ასისტენტის შექმნა.
ჩვენი სტრატეგიაა, შევიმუშაოთ შესაბამისი კომპონენტები, რომლებიც მიგვაახლოებს ამ მიზანთან, თუმცა, შუალედურად, თავად ამ კომპონენტების გამოყენებაც შევძლოთ სხვადასხვა ბიზნესპროცესში“.
