ჩინურმა სამშენებლო კომპანია Evergrande-მა ელექტრონული ავტომობილების წარმოება დაიწყო და Tesla-ს კონკურენტობას აპირებს. მეტიც, Evergrande-ის აღმასრულებელი დირექტორის – ჰუი კა იანის განცხადებით, კომპანია გეგმავს, ელექტრომობილების წარმოება მთავარ საქმიანობად აქციოს.
12 იანვარს სამშენებლო სფეროში სახელგანთქმულმა კომპანიამ საზოგადოებას პირველი ელექტრომობილი – Hengchi 5 all-electric compact SUV წარუდგინა. მის შექმნაზე პასუხისმგებელმა გუნდმა – Evergrande New Energy Vehicle Group-მა პირველი ელექტრომანქანის აწყობა ვადაზე 12 დღით ადრე მოახერხა, დეკემბერში კი მასობრივ წარმოებაზე დაიწყო მუშობა.
Hengchi 5 all-electric compact SUV-ს ერთი დამუხტვით 700 კილომეტრის გავლა შეუძლია. მისი საბაზრო ღირებულება კი დაახლოებით 200 000 იუანი, ანუ $31 450 იქნება.
აღსანიშნავია, რომ კომპანია ამჟამად სერიოზული ფინანსური პრობლემის წინაშე დგას. მას დაახლოებით $300 მილიარდი ვალი აქვს, რომლის დაფარვასაც დროულად ვერ ახერხებს, თუმცა, ეს ხელს არ უშლის, რომ საქმიანობის ახალ მიმართულებაზე კონცენტრირდეს. ფინანსური პრობლემების დაძლევაში მას ჩინეთის მთავრობაც ეხმარება.
Evergrande-ის აღმასრულებელმა დირექტორმა თავდაპირველად გასული წლის ოქტომბერში განაცხადა, რომ კომპანიის გეგმების მიხედვით, მომავალი 10 წლის განმავლობაში ავტომობილების წარმოება ბიზნესის ძირითადი მიმართულება უნდა გახდეს და მშენებლობა ჩაანაცვლოს. ამ დროისათვის, კომპანიამ ელექტრომობილების რამდენიმე სხვადასხვა მოდელი წარადგინა, თუმცა, Hengchi 5 all-electric compact SUV ერთადერთია, რომლის მასობრივი წარმოებაც უკვე დაიწყო. კომპანია გეგმავს, რომ მომდევნო 3-5 წლის განმავლობაში მსოფლიოს უმსხვილესი ელექტრომობილების მწარმოებლად იქცეს და 2025 წლისთვის წელიწადში 1 000 000 მანქანა აწარმოოს, ხოლო 2035 წლისთვის ეს რიცხვი 5 მილიონამდე გაზარდოს. შედარებისთვის, 2021 წელს Tesla–მ 936 000 ავტომობილი გამოუშვა. თუმცა, Tesla-სთან ერთად, Evergrande-ს სხვა სერიოზული კონკურენტი კომპანიებიც ეყოლება ბაზარზე. მათ შორის არიან ჩინური კომპანიებიც: BYD, Nio, Xpeng და Li Auto.
„თუ Hengchi 5 კარგად გაიყიდება, ფინანსურ კრიზისში მყოფი Evergrande-ისთვის ეს იმედის ნაპერწკალი იქნება, რომ ბიზნესი გადაარჩინონ“, – განაცხადა ერიკ ჰანმა, ბიზნესსაკონსულტაციო კომპანია Suolei-ის უფროსმა მენეჯერმა, – „ეს იყო ფინანსური კრიზისის დროს გადადგმული ძალიან მნიშვნელოვანი ნაბიჯი.
